Como vén sendo habitual, cada 24 de febreiro lembramos o nacemento da nosa poetisa máis internacional: Rosalía de Castro. O alumnado do IES Carlos Casares realizou un vídeo recitando un dos poemas de Cantares gallegos.
Durante esta semana, no vestíbulo do centro puidemos ver unha selección das obras poéticas de Rosalía de Castro acompañadas doutras publicacións: estudos monográficos Rosalía de Castro. Imaxe e realidade de Fernando Pereira, poemas musicados, recitados, rapeados ou cantados de Uxía, Narf, Aid, Najla ou Anxo Angueira.
Para rematar a nosa semana rosaliana, hoxe 26 de febreiro, contamos coa presenza de Xurxo Martínez, Doutor en Filoloxía galega e especialista no Rexurdimento e na obra de Rosalía de Castro. Comezou a súa intervención explicando a orixe do termo Rexurdimento e a súa vinculación coas literaturas europeas. Centrouse na obra Cantares gallegos, explicou a orixe dos poemas, as principais temáticas e animou aos rapaces a recitar algún verso de Rosalía. 
Ningún comentario:
Publicar un comentario